Ég vildi svo innilega óska að ég gæti sagt að ég ætlaði aldrei að flytja aftur.  Nú þurfti að drífa í að tæma í Hrafnhólunum hjá Þórhildi, þau eru búin að selja og það er afhending á miðvikudag (sem var vitað af á föstudag).  Ég er því búin að vera að koma draslinu mínu fyrir hingað og þangað um landið í dag.  Frá Flúðum til Reykjavíkur.  Og enn ekki búin, því það er slatti af kössum eftir fyrir austan.  Helgin fór ss í þetta og ég sem ætlaði að vera svo dugleg að læra.    Ég þarf virkilega að fara að taka mig á í stærðfræðigreiningunni ef hún á ekki að fara veg allrar veraldar - aftur.  Mér gengur nú samt betur en í haust - og er þar að auki komin með reiknifélaga!  Sem mér er sagt að sé afskaplega mikilvægt...  Almenna jarðeðlisfræðin finnst mér hins vegar afskaplega skemmtileg, í síðustu viku vorum við að reikna hve djúpt fjallsrætur ná og hvaða áhrif ísaldarjökullinn hafði á stinnhvolf og linhvolf og hversu hratt landið rís eftir að jökullinn bráðnaði.  T.d. reis landið mjög hratt á Íslandi.  Mjög skemmtilegt!  Ömmu fannst það líka.  En eiginlega engum öðrum í fjölskyldunni, merkilegt nokk...

Eitt afskaplega skemmtilegt við flutninga dagsins (eins leiðinlegir og flutningar eru, svona almennt) er að ég er búin að fá skrifborðið mitt!!  Loksins loksins þarf ég ekki lengur að húka við eldhúsborðið með tölvuna (þessa nýju fínu ) og bækurnar!  Fátt er svo með öllu illt....  En ætli sé ekki best að gera syni mína klára í skólann á morgun... það munar svo ægilega miklu að hafa allt klárt á morgnana! 

Eftir meira eða minna mánaðar vetrardvala held ég bara að ég sé að rumska.  Ekki alveg vöknuð ennþá, en það nálgast.  Og ég er ekki einu sinni að grínast nema bara pínulítið, ég er búin að vera meira eða minna sofandi núna frá því um jólin.  Reyndar var mér sagt að eftir það sem á undan er gengið sl. haust hefði verið fullkomlega eðlilegt að dvalinn hefði verið þrefalt lengri, en, því miður, þá er ekki gert ráð fyrir svo eðlilegum hlut í nútíma samfélagi.  Sem gerir yfirhöfuð lítið ráð fyrir eðlilegum eða náttúrulegum hlutum.  Þann tíma sem ég hef ekki verið sofandi (það eru jú takmörk fyrir öllu, jafnvel því hvað ég get sofið mikið!) hef ég lesið - og ég er ekki að tala um skólabækurnar.  Ég var t.d. að ljúka við að endurlesa hringadróttinssögu, sem tók sirka viku - þó ég viðurkenni að hafa hraðspólað yfir suma kafla, dvöl Káts og Pípins hjá orkunum er ekki í uppáhaldi hjá mér né heldur viðureign Sóma og Fróða við Skellu gömlu eða ferð þeirra yfir Gorgorothsléttu.  Brrrr!  Alltof drungalegt fyrir mig, allavega akkúrat núna.  En ég verð að segja að mér fannst gaman að sjá hvað þeir hafa í rauninni notað mikið úr bókinni í myndunum, þó það sé ekki endilega alltaf í sama samhengi.  Mér fannst það ekkert koma að sök og allt geta alveg passað.  En nú fer að koma að því að ég lesi bara skólabækurnar mínar, ég er að verða dálítið á eftir og verð að passa að það verði ekki of langt.  Svo nú er best að ég fari að sofa svo ég nái að hafa mig í tíma á morgun...

Hafðu með þér stofublóm hvert sem þú ferð.  Það gefur tilverunni lit.  Sérstaklega í öllum snjónum.

Í fyrsta lagi, ég fékk 8 í tölvunarfræði!!!    Jibbí jei!!  Það var mun betra en ég átti von á!

Í öðru lagi, ég er næsta inn á biðlista stúdentagarða!  Kannski fer ég að komast inn hjá þeim....

Í þriðja lagi, ég virðist loksins vera búin að koma svefntímanum á rétt ról.  Það er búið að taka alla vikuna (sem er NB búin að vera frekar erfið) en þetta er að hafast.

Og í kvöld fer ég í ammli til Siggu hans Einars.  Funfunfun!

Dagurinn byrjaði nú ekki skemmtilega, ég vaknaði kl. 2 eftir tveggja tíma svefn og gat ómögulega sofnað aftur.  Fyrr en kl. 7.  Og kl. 8 þurfti ég að hífa mig á lappir til að koma strákunum í skólann, svo að heildarsvefn næturinnar var rétt um 3 tímar.  Ekki fönguleg byrjun á fyrsta skóladeginum.  En ég hafði nú samt af að hressa mig við og mæta - kannski ekki eldhress - í stærðfræðigreiningu, taka 2.  Mér leist nú mun betur á þennan kennara heldur en þann sem var fyrir áramót.  Það var hressandi tilbreyting að sitja og láta sér leiðast af því að ég kunni allt sem kennarinn var að tala um.   Það gefur manni smávon um að geta fylgst með að þessu sinni.  Síðan var almenn jarðeðlisfræði, loksins eitthvað almennilegt!  Lögun jarðar og þyngdarsvið og GPS mælingar og segulsvið og geislavirkni og skjálftabylgjur og margt margt fleira!  Svona á þetta að vera!  Það sakar heldur ekki að Magnús Tumi skuli kenna hluta námskeiðsins...   Ég býst við að eftir fyrirlestrana hefði verið skynsamlegt að dempa sér í lesturinn en þriggja tíma svefn er engan veginn fyrir svoleiðis átök svo ég fór bara heim og lagði mig.  Lesturinn byrjar á morgun.

og ég meirað segja barnlaus og allt. Alla helgina. Ætli ég geri eitthvað af viti? Ekki gott að segja... Ég þyrfti að taka til heima hjá mér, koma hlutum fyrir og svoleiðis, ná í restina af þeim húsgögnum sem ég kem fyrir í pínulitlu íbúðinni minni, kíkja aðeins á stærðfræðina áður en skólinn byrjar á mánudaginn - og svo sef ég til rúmlega 3. Ekki góð byrjun. Kannski ég fari að kaupa mér bækur fyrir skólann.